काठमाडौं । प्रेम सम्बन्धमा साना–साना कुराले पनि ठूलो अर्थ राख्छन्। बिहान उठ्नेबित्तिकै प्रेमी वा प्रेमिकाबाट आउने एउटा मिठो सन्देशले दिनको सुरुआत खुसीमय बनाउन सक्छ। तर, त्यही समयमा रिस, शङ्का वा व्यङ्ग्यले भरिएको म्यासेज पठाउँदा भने सम्बन्धमा तनाव बढ्न सक्छ।

सम्बन्धमा आफ्नो भावना व्यक्त गर्नु आवश्यक हुन्छ। तर, आफूले भन्न खोजेको कुरा कसरी र कुन समयमा व्यक्त गरिन्छ भन्ने कुराले पनि महत्त्व राख्छ। विशेषगरी बिहान उठ्नेबित्तिकै गरिने आरोप र गुनासाले पार्टनरको मन दुखाउन सक्छ। त्यसैले प्रेमिकालाई म्यासेज गर्दा केही कुरामा ध्यान दिनु आवश्यक हुन्छ।

१. राति अनलाइन आएको विषयमा प्रश्न नगर्नुहोस्

प्रेमिका राति सामाजिक सञ्जालमा अनलाइन देखिएकी थिइन्, तर आफूलाई म्यासेज गरिनन् भन्दैमा उनले बेवास्ता गरेकी हुन् भन्ने निष्कर्षमा पुग्नु हुँदैन। उनी कुनै काममा व्यस्त भएकी वा आराम गर्न चाहेको पनि हुन सक्छ। बिहान उठ्नेबित्तिकै यसबारे प्रश्न गर्दा उनलाई आफू निगरानीमा रहेको महसुस हुन सक्छ। प्रेम सम्बन्धमा माया जत्तिकै विश्वास पनि आवश्यक हुन्छ।

२. आफूलाई वास्ता नगरेको आरोप नलगाउनुहोस्

‘तिमीलाई मेरो कुनै मतलब छैन’ वा ‘तिमीलाई मेरो वास्ता नै छैन’ जस्ता म्यासेजले सम्बन्धमा अनावश्यक तनाव बढाउन सक्छन्। प्रेमिकाले पर्याप्त समय नदिएको महसुस भएमा आरोप लगाउनुभन्दा आफ्नो भावना स्पष्ट र सम्मानजनक रूपमा व्यक्त गर्नु राम्रो हुन्छ। आफूलाई उनीसँग समय बिताउन मन लागेको कुरा शान्त तरिकाले बताउँदा एकअर्कालाई बुझ्न सहज हुन्छ।

३. पहिले जस्तो नभएको भन्दै गुनासो नगर्नुहोस्

समयसँगै सम्बन्धमा आउने परिवर्तन स्वाभाविक हो। पढाइ, जागिर, परिवार र अन्य जिम्मेवारीका कारण पहिले जति समय दिन नसक्ने अवस्था आउन सक्छ। यस्तो अवस्थामा ‘तिमी पहिले जस्तो रहिनौ’ भन्दै बिहानै गुनासो गर्दा प्रेमिकाको मन दुख्न सक्छ। सम्बन्धमा दूरी बढेको महसुस भए त्यसको कारण बुझ्ने प्रयास गर्नुपर्छ। उनी कुनै समस्याबाट गुज्रिरहेकी हुन सक्छिन् र उनलाई तपाईंको साथ तथा सहयोग आवश्यक पर्न सक्छ।

४. बिना कारण शङ्का नगर्नुहोस्

बिना आधार बारम्बार शङ्का गर्ने र हरेक कुरामा स्पष्टीकरण माग्ने बानीले सम्बन्धमा विश्वास कमजोर बनाउन सक्छ। हरेक कुराकानीको सुरुआत नै प्रश्न र आरोपबाट हुँदा पार्टनरलाई मानसिक दबाब महसुस हुन सक्छ। कुनै विषयमा शङ्का लागेको छ भने बिहानै आरोप लगाउनुको सट्टा उपयुक्त समयमा खुलेर कुराकानी गर्नु राम्रो हुन्छ।

प्रेम सम्बन्धलाई बलियो बनाउन माया व्यक्त गर्नुका साथै एकअर्काको भावना बुझ्ने, विश्वास गर्ने र सम्मान गर्ने बानी आवश्यक हुन्छ। असन्तुष्टि वा गुनासो व्यक्त गर्नु गलत होइन, तर त्यसलाई व्यक्त गर्ने तरिकाले सम्बन्धलाई बलियो बनाउन पनि सक्छ र कमजोर बनाउन पनि।